नगरपालिका निवडणुकीत शिवसेनेचा स्ट्राईक रेट कायम ; शहाजी पाटील यांचं एकनाथ शिंदेंकडून विशेष कौतुक

मुंबई | 23 डिसेंबर

राज्यभरात पार पडलेल्या नगरपालिका निवडणुकांमध्ये शिवसेनेने उल्लेखनीय यश मिळवत आपला दबदबा कायम राखला आहे. या पार्श्वभूमीवर मुंबईत आयोजित सत्कार समारंभात नवनिर्वाचित नगराध्यक्ष व नगरसेवकांचा उपमुख्यमंत्री एकनाथ शिंदे यांच्या हस्ते सन्मान करण्यात आला. या कार्यक्रमात सांगोल्याचे माजी आमदार शहाजी पाटील यांच्या कामगिरीचं शिंदेंनी विशेष कौतुक केलं.

शहाजी पाटील यांनी सर्वपक्षीय पॅनेलचा केला पराभव

भाषणादरम्यान उपमुख्यमंत्री एकनाथ शिंदे म्हणाले की, सांगोल्यात शहाजी पाटील यांनी भाजप आणि सर्वपक्षीय पॅनेलला पराभूत करत शिवसेनेचे नगराध्यक्ष व नगरसेवक बहुसंख्येने निवडून आणले.
“शहाजीबापूंना सर्वांनी चक्रव्यूहात पकडलं होतं, पण त्यांनी तो चक्रव्यूह भेदून सर्वांना आडवं करून टाकलं. शहाजीबापू एकदम ओके,” अशा शब्दांत शिंदेंनी पाटील यांचे कौतुक केले. यावेळी शहाजी पाटील यांनी व्यासपीठावरच उपमुख्यमंत्री शिंदेंच्या पाया पडत कृतज्ञता व्यक्त केली.

शिवसेनेचे राज्यभरात मोठे यश

उपमुख्यमंत्री शिंदे यांनी सांगितले की,

• राज्यभरात ६२ पेक्षा जास्त शिवसेनेचे नगराध्यक्ष निवडून आले आहेत
• ७० नगराध्यक्ष शिवसेना पुरस्कृत आहेत
• कमी जागा लढवून अधिक यश मिळवण्यात शिवसेना यशस्वी ठरली आहे

लोकसभा व विधानसभा निवडणुकांप्रमाणेच नगरपालिका निवडणुकांमध्येही शिवसेनेने आपला स्ट्राईक रेट कायम राखला, असे त्यांनी स्पष्ट केले.

‘शिवसेना फक्त मुंबई-ठाण्यापुरती नाही’

शिवसेना केवळ मुंबई आणि ठाण्यापुरती मर्यादित आहे, हा गैरसमज नगरपालिका निवडणुकांनी दूर केला आहे, असे सांगत शिंदे म्हणाले की,
“चांद्यापासून बांद्यापर्यंत शिवसेनेने यश मिळवलं आहे. मंचर, चाकण, त्र्यंबकेश्वर, चंद्रपूर, भद्रावती, धानोरा अशा ठिकाणीही आपण विजयी झालो आहोत.”

उद्धव ठाकरे यांच्यावर टोलेबाजी

भाषणादरम्यान एकनाथ शिंदे यांनी माजी मुख्यमंत्री उद्धव ठाकरे यांच्यावर अप्रत्यक्ष टीका केली.
“मी प्रचारासाठी जिथे जात होतो तिथे लाडक्या बहिणी मोठ्या संख्येने दिसायच्या, लाडके भाऊ मात्र कमी दिसायचे,” अशी मिश्किल टिप्पणी करत त्यांनी उपस्थितांची हशा पिकवला.
तसेच, “नकली घरपर बैठे है, असली मेरे सामने बैठे है,” असे म्हणत त्यांनी ठाकरेंवर टोला लगावला.

आगामी निवडणुकांसाठी शिवसेनेची तयारी

आगामी निवडणुकांच्या पार्श्वभूमीवर शिवसेनेची संघटन मजबूत करण्यावर भर देणार असल्याचे उपमुख्यमंत्री शिंदे यांनी सांगितले.
“प्रत्येक नगराध्यक्ष, नगरसेवक आणि नगरपालिका प्रतिनिधींना मी वैयक्तिक वेळ देणार आहे,” असे आश्वासनही त्यांनी दिले.