सोरतापवाडी (ता. हवेली) येथील उच्चशिक्षित इंजिनिअर विवाहिता दीप्ती मगर-चौधरी हिने सासरच्या जाचाला कंटाळून आत्महत्या केल्याची धक्कादायक घटना समोर आली आहे. या प्रकरणी राज्य महिला आयोगाच्या अध्यक्षा रुपाली चाकणकर यांनी आज पीडित कुटुंबाची भेट घेतली आणि पत्रकार परिषदेत सासरच्या लोकांवर कडक कारवाई करण्याचे आश्वासन दिले.
नेमकी घटना काय?
दीप्ती चौधरी हिचे लग्न सोरतापवाडी येथील रोहन चौधरी याच्याशी झाले होते. लग्नानंतर काही काळातच हुंड्यासाठी तिचा छळ सुरू झाला. सासरच्या मंडळींनी ५० तोळे सोने, ३५ लाख रुपये रोख आणि जमिनीची मागणी करत दीप्तीचा शारीरिक आणि मानसिक छळ केला. धक्कादायक बाब म्हणजे, दुसरी मुलगी होईल या भीतीने तिचा जबरदस्तीने गर्भपात घडवून आणल्याचा खळबळजनक आरोपही समोर आला आहे.
३ वर्षांच्या मुलीसमोर संपवले आयुष्य
२५ जानेवारी रोजी सासरच्या सततच्या त्रासाला आणि चारित्र्यावरील संशयाला कंटाळून दीप्तीने आपल्या ३ वर्षांच्या चिमुकलीसमोरच गळफास घेऊन आत्महत्या केली. आईला अशा अवस्थेत पाहून त्या लहान मुलीवर मोठा मानसिक आघात झाला आहे.
रुपाली चाकणकर यांचा आक्रमक पवित्रा
पत्रकार परिषदेत बोलताना रुपाली चाकणकर यांनी सांगितले की:
- कडक कारवाई: या प्रकरणात पती आणि सासूला अटक करण्यात आली असून त्यांना ३० जानेवारीपर्यंत पोलीस कोठडी सुनावण्यात आली आहे.
- फरार आरोपी: दीप्तीचे सासरे आणि दीर सध्या फरार असून पोलीस त्यांचा शोध घेत आहेत.
- फाशीची मागणी: “दीप्तीला न्याय मिळवून देण्यासाठी आणि दोषींना फाशीची शिक्षा व्हावी यासाठी महिला आयोग पाठपुरावा करेल,” असे चाकणकर यांनी स्पष्ट केले.
- कुटुंबाचा पवित्रा: जोपर्यंत सर्व आरोपींना अटक होत नाही, तोपर्यंत अंत्यसंस्कार न करण्याचा पवित्रा मगर कुटुंबाने घेतला होता.
समाजातून संताप
या घटनेमुळे पुणे जिल्ह्यात संतापाची लाट उसळली आहे. उच्चशिक्षित असूनही हुंडाबळी आणि छळाला बळी पडणाऱ्या महिलांच्या सुरक्षेचा प्रश्न पुन्हा एकदा ऐरणीवर आला आहे.
By
