अन्न व औषध प्रशासन (FDA) आयुक्त तुकाराम मुंढे यांच्या नेतृत्वाखाली राज्यभरात भेसळयुक्त खाद्यपदार्थ, अस्वच्छ हॉटेल्स आणि ॲनालॉग बनावट पनीरविरोधात धडक कारवाई सत्र सुरू करण्यात आले आहे.
आपल्या कडक व धडक कार्यपद्धतीसाठी ओळखले जाणारे सनदी अधिकारी आणि अन्न व औषध प्रशासनाचे (FDA) आयुक्त तुकाराम मुंढे यांनी पदभार स्वीकारताच राज्यातील भेसळखोरांविरोधात मोठी मोहीम उघडली आहे. मुंबई, पुणे, बीड, जळगाव आणि छत्रपती संभाजीनगरसह संपूर्ण महाराष्ट्रात बनावट पनीर, भेसळयुक्त खाद्यतेल, अस्वच्छ हॉटेल्स आणि नामांकित फूड चेन्सवर एफडीएने अचानक छापे टाकले आहेत.
ॲनालॉग बनावट पनीरवर बंदी व धाडसत्र
पामतेल आणि वनस्पती चरबीपासून तयार होणाऱ्या ‘ॲनालॉग पनीर’वर (Non-dairy Paneer) अन्न सुरक्षा नियमांनुसार महाराष्ट्रात एका वर्षासाठी बंदी घालण्यात आली आहे. तरीही अनेक नामांकित हॉटेल्स, रेस्टॉरंट्स आणि केटरर्स ग्राहकांना अस्सल दुधाच्या पनीरऐवजी हे बनावट पनीर खाऊ घालत असल्याचे तपासणीत निष्पन्न झाले. एफडीएच्या विशेष पथकांनी आतापर्यंत शेकडो ठिकाणी अचानक तपासणी करून हजारो किलो बनावट पनीर व दुग्धजन्य पदार्थ जप्त करून नष्ट केले आहेत.
हॉटेल्स, क्विक-कॉमर्स आणि नामांकित ब्रँड्सवर कारवाईचा बडगा
राज्यात आतापर्यंत १,१०० हून अधिक आस्थापनांची झाडाझडती घेण्यात आली असून नियमांचे उल्लंघन करणाऱ्या ५० हून अधिक हॉटेल्स आणि रेस्टॉरंट्सचे अन्न परवाने थेट निलंबित करण्यात आले आहेत. या मोहिमेत केवळ साधे ढाबेच नव्हे, तर नामांकित ब्रँड्स, ई-कॉमर्स व क्विक-कॉमर्स गोदामांनाही सुधारणा नोटिसा बजावण्यात आल्या आहेत. किचनमधील अस्वच्छता, पेस्ट कंट्रोलचा अभाव आणि अन्न सुरक्षेच्या मानकांकडे दुर्लक्ष करणाऱ्यांवर कठोर दंडात्मक कारवाई करण्यात येत आहे.
तुकाराम मुंढे यांचा इशारा
नागरिकांच्या आरोग्याशी खेळणाऱ्या कोणत्याही व्यावसायिकाची गय केली जाणार नाही, असा स्पष्ट इशारा आयुक्त तुकाराम मुंढे यांनी दिला आहे. खाद्यपदार्थांच्या गुणवत्तेबाबत कोणतीही तडजोड खपवून घेतली जाणार नसून ही मोहीम यापुढेही अशीच सुरू राहील, असे एफडीए प्रशासनाने स्पष्ट केले आहे.
By
By
