पुणे | जुन्नर : ‘ऑपरेशन सिंदूर’दरम्यान भारत सरकारच्या वेबसाइट्सवर झालेल्या कथित सायबर हल्ल्यांच्या प्रकरणात राष्ट्रीय तपास यंत्रणेने (NIA) मोठी कारवाई केली आहे. NIA ने महाराष्ट्रासह पाच राज्ये आणि दिल्लीतील एकूण पाच ठिकाणी एकाचवेळी झडती घेतली. महाराष्ट्रातील पुणे जिल्ह्यातील जुन्नर येथेही ही कारवाई करण्यात आली.
या प्रकरणाचा संबंध भारत सरकारच्या विविध संस्थांच्या 54 वेबसाइट्सवर करण्यात आलेल्या कथित Distributed Denial-of-Service (DDoS) हल्ल्यांच्या प्रयत्नांशी आहे. या हल्ल्यांमध्ये महत्त्वाच्या संगणकीय संसाधनांसह Critical Information Infrastructure (CII) ला लक्ष्य करण्याचा प्रयत्न झाल्याचे तपास यंत्रणेने म्हटले आहे.
जुन्नरसह पाच ठिकाणी छापेमारी
NIA च्या माहितीनुसार, महाराष्ट्रातील जुन्नर (पुणे), गुजरातमधील नडियाद (खेड़ा), तेलंगणातील रामागुंडम (करीमनगर), बिहारमधील गोपालगंज आणि दिल्ली येथे संशयितांच्या ठिकाणांवर झडती घेण्यात आली. ही कारवाई न्यायालयाकडून शोध वॉरंट मिळाल्यानंतर करण्यात आल्याचे सांगण्यात आले आहे.
3 लॅपटॉप, 5 मोबाईल आणि पेनड्राइव्ह जप्त
झडतीदरम्यान हॅकिंगशी संबंधित कथित आक्षेपार्ह सामग्री असलेली डिजिटल उपकरणे आणि कागदपत्रे तपास यंत्रणेच्या हाती लागली. NIA ने नियमानुसार 3 लॅपटॉप, 5 मोबाईल फोन तसेच पेनड्राइव्हसह इतर डिजिटल उपकरणे जप्त केली आहेत. संशयितांची अटक केलेल्या आरोपींशी असलेली कथित भूमिका आणि संबंध याबाबतही चौकशी करण्यात आली.
नेमकं काय आहे प्रकरण?
या प्रकरणाची सुरुवात गुजरातमध्ये झाली होती. NIA ने हे प्रकरण 25 जून 2025 रोजी नोंदवले होते. तपासादरम्यान तांत्रिक विश्लेषणाच्या माध्यमातून अशा संशयितांची ओळख पटवण्यात आली, ज्यांनी कथितरित्या DDoS हल्ल्यांची तयारी आणि तांत्रिक कौशल्य विकसित करण्यासाठी आरोपींना मदत केली होती. या प्रकरणात यापूर्वीच दोन आरोपींना अटक करण्यात आली आहे.
NIA च्या तपासानुसार, हे कथित हल्ले ‘ऑपरेशन सिंदूर’च्या कालावधीत करण्यात आले होते. हल्ल्यांचा उद्देश देशाची सार्वभौमता, सुरक्षा आणि एकता धोक्यात आणणे तसेच नागरिकांमध्ये भीती निर्माण करणे असल्याचा तपास यंत्रणेचा आरोप आहे.
पुढील तपास सुरू
जप्त करण्यात आलेल्या लॅपटॉप, मोबाईल, पेनड्राइव्ह आणि इतर डिजिटल उपकरणांचे फॉरेन्सिक विश्लेषण केले जाणार आहे. या माध्यमातून कथित सायबर हल्ल्यांमागील नेटवर्क, तांत्रिक मदत करणाऱ्या व्यक्ती आणि इतर संभाव्य सहभागींविषयी माहिती मिळवण्याचा NIA चा प्रयत्न आहे.
दरम्यान, या प्रकरणातील पुढील तपास सुरू असून, जप्त डिजिटल सामग्रीच्या तपासातून आणखी काही महत्त्वाचे धागेदोरे समोर येतात का, याकडे लक्ष लागले आहे.
By
By
