पुणे गणेश विसर्जन मिरवणूक २०२६ साठी पुणे पोलिसांची अभूतपूर्व तयारी! ३५०० सीसीटीव्ही कॅमेरे आणि अत्याधुनिक कमांड सेंटरच्या मदतीने शहरावर २४ तास करडी नजर, एआय तंत्रज्ञानाने मिरवणूक सुरक्षित राहणार.
पुण्यात गणेश विसर्जन मिरवणुकीची तयारी अंतिम टप्प्यात पोहोचली असून, यंदा पुणे पोलिसांनी सुरक्षेच्या दृष्टीने अभूतपूर्व पावले उचलली आहेत. लाखो भाविकांच्या उपस्थितीत शांतता आणि सुरक्षितता राखण्यासाठी, संपूर्ण शहरावर अत्याधुनिक तंत्रज्ञानाच्या मदतीने २४ तास करडी नजर ठेवली जाणार आहे.
गणेश विसर्जन मिरवणुकीदरम्यान कोणतीही अनुचित घटना घडू नये यासाठी पुणे पोलीस प्रशासनाने कंबर कसली आहे. शहरात तब्बल ३,५०० सीसीटीव्ही कॅमेऱ्यांच्या माध्यमातून प्रत्येक महत्त्वाच्या हालचालीवर बारीक लक्ष ठेवले जात आहे. प्रमुख गणेश मंडळे, विसर्जन मिरवणुकीचे मुख्य मार्ग, महत्त्वाचे चौक आणि गर्दीच्या सर्व ठिकाणांवर या हायटेक कॅमेऱ्यांची नजर आहे. एखादी संशयास्पद बाब निदर्शनास आल्यास ‘कमांड अँड कंट्रोल सेंटर’मधून तातडीने कारवाईचे आदेश दिले जातात.
## कमांड सेंटरवरून थेट नियंत्रण आणि नियोजन
मिरवणुकीच्या मार्गावर तैनात असलेल्या पोलीस कर्मचाऱ्यांना वेळोवेळी आवश्यक सूचना देणे, गर्दीच्या परिस्थितीचा आढावा घेणे, वाहतुकीचे नियोजन करणे आणि परिस्थितीनुसार पोलीस बंदोबस्तात तातडीने बदल करणे… ही सर्व महत्त्वाची कामे या मध्यवर्ती ‘कमांड अँड कंट्रोल सेंटर’मधूनच केली जात आहेत. गणेश विसर्जन सोहळ्यात लाखो भाविक रस्त्यावर असल्याने, गर्दीतील प्रत्येक हालचालीवर आणि सुरक्षेवर बारीक लक्ष ठेवण्यासाठी हे पुणे पोलिसांचे कमांड कंट्रोल सेंटर अत्यंत महत्त्वाची भूमिका बजावत आहे.
पोलीस आयुक्त अमितेश कुमार आणि जॉईंट सीपी संजय दराडे यांच्या थेट मार्गदर्शनाखाली संपूर्ण विसर्जन मिरवणूक शांततेत आणि निर्विघ्नपणे पार पडावी यासाठी हे चोख नियोजन करण्यात आले आहे. शहरात एकूण ३,५०० सीसीटीव्ही कॅमेरे कार्यरत असून, विशेषतः विसर्जन मिरवणुकीच्या मुख्य मार्गांवर अतिरिक्त ४०० कॅमेरे बसवण्यात आले आहेत. हे सर्व कॅमेरे ‘नाईट व्हिजन’ आणि ‘एआय बेस’ (कृत्रिम बुद्धिमत्ता) तंत्रज्ञानाने सज्ज आहेत.
## एआय तंत्रज्ञानाचे सुरक्षा कवच
या अत्याधुनिक सीसीटीव्ही कॅमेऱ्यांमध्ये अनेक स्मार्ट फीचर्स समाविष्ट आहेत, ज्यामुळे पोलिसांना ऑटोमॅटिक अलर्ट मिळतात. ‘फेस रेकग्निशन’ तंत्रज्ञानामुळे गुन्हेगारी पार्श्वभूमी असलेला किंवा क्राईम रेकॉर्डशी जुळणारा कोणताही संशयित व्यक्ती गर्दीत दिसून आल्यास तातडीने अलर्ट मिळतो. कॅमेऱ्यात रेकॉर्ड झालेल्या फोटो किंवा व्हिडिओमध्ये क्राईमशी संबंधित व्यक्ती आढळल्यास त्याचा संपूर्ण भूतकाळ आणि त्याच्यावर दाखल असलेले गुन्हे ही सर्व माहिती स्क्रीनवर लगेच समोर येते.
याशिवाय, गर्दीच्या ठिकाणी कोणी संशयास्पद वस्तू सोडून गेले, हत्यार घेऊन फिरत असेल किंवा कोणतीही ज्वालाग्राही/स्फोटक घटना घडल्यास याचे ऑटोमॅटिक अलर्ट कंट्रोल रूमला मिळतात. ‘तातडीने कारवाईची यंत्रणा’ यामुळे अधिक सक्षम झाली आहे. एआय कॅमेरे संशयितांना ओळखतात आणि ही माहिती मिळताच घटनास्थळावर सज्ज असलेल्या क्रिमिनॉलॉजी/क्राईम ब्राँचच्या टीमला व्हॉट्सॲप ग्रुप्स आणि वायरलेस नेटवर्कद्वारे त्वरित अलर्ट पाठवला जातो, ज्यामुळे पोलीस काही क्षणांत त्या संशयिताला ताब्यात घेऊ शकतात.
‘पीपल काउंटिंग’ (People Counting) तंत्रज्ञानामुळे बेलबाग चौक, अलका टॉकीज चौक यांसारख्या अत्यंत संवेदनशील आणि गर्दीच्या ठिकाणी किती नागरिक उपस्थित आहेत, याची अचूक गणना केली जात असून त्यावर सतत मॉनिटरिंग सुरू आहे. यामुळे गर्दीचे व्यवस्थापन प्रभावीपणे करण्यास मदत होते.
पुणे पोलिसांनी आधुनिक तंत्रज्ञानाचा वापर करून एक विशेष हायटेक सेटअप आणि कमांड अँड कंट्रोल रूम तयार केली आहे. या अत्याधुनिक यंत्रणेमुळे यंदाच्या गणेश विसर्जन मिरवणुकीवर पूर्णपणे पारदर्शक आणि चोख लक्ष ठेवणे पोलिसांना शक्य होणार असून, पुणेकरांचा विसर्जन सोहळा अधिक सुरक्षित आणि आनंदी वातावरणात पार पडेल. या तंत्रज्ञानामुळे पुणे पोलीस सुरक्षा यंत्रणा अधिक सतर्क झाली आहे.
By
By
