बीड : जिल्ह्यातील हिवरा पहाडी या गावात एक धक्कादायक घटना समोर आली आहे. गावातीलच एका विवाहित तरुणीचे अपहरण करून तिच्यावर अत्याचार करण्यात आल्याची घटना उघडकीस आली असून या प्रकारामुळे परिसरात मोठी खळबळ उडाली आहे.मिळालेल्या माहितीनुसार, गावातीलच वैभव पटेकर या तरुणाने रात्रीच्या सुमारास संबंधित विवाहित तरुणीला जबरदस्तीने उचलून नेले. त्यानंतर तिच्यावर अत्याचार केल्याचा आरोप आहे. इतक्यावरच न थांबता पहाटेच्या सुमारास आरोपीने पीडितेला गावातील चावडीला बांधून ठेवले, असा गंभीर आरोप करण्यात आला आहे.
सकाळी गावातील नागरिकांच्या निदर्शनास हा प्रकार आल्यानंतर एकच खळबळ उडाली. स्थानिकांनी तातडीने पोलिसांना माहिती दिल्यानंतर संपूर्ण घटना उघडकीस आली..
पीडित तरुणीच्या फिर्यादीवरून पिंपळनेर पोलीस ठाणे येथे आरोपी वैभव पटेकर याच्या विरोधात गुन्हा दाखल करण्यात आला आहे. पोलिसांनी तातडीने कारवाई करत आरोपीला अटक केली असून पुढील तपास सुरू आहे.
या घटनेमुळे गावासह संपूर्ण बीड जिल्ह्यात संतापाची लाट उसळली असून आरोपीवर कठोर कारवाई करण्याची मागणी नागरिकांकडून होत आहे.
By
