कराड दक्षिणमधील पराभवावरून भाजप आमदार अतुल भोसले यांनी माजी मुख्यमंत्री पृथ्वीराज चव्हाण यांच्यावर जोरदार टीका केली आहे. नेमकं काय म्हणाले भोसले? वाचा सविस्तर बातमी.
कराड दक्षिण विधानसभा मतदारसंघातील राजकीय वातावरण पुन्हा एकदा तापले आहे. माजी मुख्यमंत्री पृथ्वीराज चव्हाण यांनी केलेल्या विविध विधानांवर आणि निवडणूक पराभवाच्या कारणांवर भाजपचे आमदार डॉ. अतुल भोसले यांनी जोरदार निशाणा साधला आहे. “पृथ्वीराजबाबांनी पराभवाची वेगवेगळी कारणे सांगण्यापेक्षा नेमका कशामुळे पराभव झाला, हे आधी स्वतःच ठरवावं,” असा सणसणीत टोला अतुल भोसले यांनी लगावला आहे.
दीर्घकाळ सत्तेत राहिल्याने धक्का बसलाय – अतुल भोसले
आमदार डॉ. अतुल भोसले यांनी पृथ्वीराज चव्हाण यांच्या टीकेला उत्तर देताना म्हटले की,
“पृथ्वीराजबाबा हे अनेक वर्षे सत्तेत राहिलेले आहेत. त्यांच्या वडिलांपासून मातोश्रींपर्यंत संपूर्ण कुटुंब सत्तेत राहिले आहे. त्यामुळे एकदम सत्ता गेल्यामुळे त्यांना मानसिकदृष्ट्या मोठा धक्का बसला आहे.”
पराभवाची रोज नवी कारणे; भोसलेंची विचारणा
पृथ्वीराज चव्हाण यांच्या सातत्याने बदलणाऱ्या भूमिकांवर बोट ठेवत अतुल भोसले म्हणाले:
- ईव्हीएमचा दावा: निवडणूक निकाल लागताच ईव्हीएम हॅक झाल्यामुळे पराभव झाल्याचा दावा करण्यात आला.
- दुबार मतदार: त्यानंतर मतदार यादीत बोगस आणि दुबार मतदार असल्याचा आरोप केला गेला.
- सरकारी यंत्रणांचा वापर: शेवटी प्रशासकीय व सरकारी यंत्रणांचा अतिवापर झाल्यामुळे पराभव झाल्याचे सांगण्यात आले.
यावर बोलताना भोसले म्हणाले, “जर ईव्हीएमच हॅक होती, तर मग बाकीच्या गोष्टी करण्याची गरजच काय होती? त्यामुळे बाबांनी आधी नक्की कशामुळे पराभव झालाय हे स्पष्ट ठरवावे. जनतेने तुम्हाला तुमचा कारभार नाकारून मला संधी दिली आहे आणि मी मतदारसंघाच्या विकासासाठी १०० टक्के प्रयत्न करत आहे.”
गोपीनाथ मुंडेंच्या विषयावरही सुनावले
स्व. गोपीनाथ मुंडे यांच्या काँग्रेस प्रवेशाच्या कथित दाव्यांवर बोलताना आमदार भोसले म्हणाले:
“गोपीनाथ मुंडे साहेब आज आपल्यामध्ये नाहीत. जे व्यक्ती आज हयात नाहीत, त्यांच्याबद्दल अशा पद्धतीची विधाने करणे योग्य नाही. जर मी उद्या असा दावा केला की स्वर्गीय आनंदराव चव्हाण यांना शेकापमधून काँग्रेसमध्ये कसे आणले हे मला माहिती आहे, तर या बोलण्याला काही अर्थ उरेल का? अशा पद्धतीची वक्तव्ये त्यांनी टाळायला हवीत. त्यांनी आता ग्रेसफुली रिटायर व्हावे किंवा काहीतरी सकारात्मक काम करावे.”
आम्ही बाबांना गांभीर्याने घेणे बंद केले आहे!
कराड दक्षिण मतदारसंघात झालेल्या SIR प्रक्रियेचा डेटा सार्वजनिकरित्या उपलब्ध असतानाही पृथ्वीराज चव्हाण सातत्याने वेगळी आकडेवारी मांडत असल्याचा आरोप भोसलेंनी केला. “पृथ्वीराजबाबा वारंवार वेगवेगळी आकडेवारी सांगतात, त्यामुळे त्यांना नेमकं किती गांभीर्याने घ्यायचं हा प्रश्न आहे. आम्ही आता त्यांना गांभीर्याने घेणे बंद केले असून आमचे संपूर्ण लक्ष मतदारसंघाच्या विकासावर केंद्रित केले आहे,” असेही भोसले यांनी स्पष्ट केले.
By
By
