दसरा मेळावा 2025 : नवरात्री, शायरी आणि जातीपातीचे राक्षस संपवण्याचं आवाहन – पंकजा मुंडेंचं आक्रमक भाषण

गेल्या 11 वर्षांपासून मराठवाड्यात पंकजा मुंडे यांच्या नेतृत्वाखाली आयोजित होणाऱ्या दसरा मेळाव्याकडे राजकीय वर्तुळाचं विशेष लक्ष लागलेलं असतं. यंदाही बीड जिल्ह्यातील सावरगाव येथे झालेल्या मेळाव्यात पंकजा मुंडे यांनी आक्रमक भाषण करत जातीयवादाचे राक्षस संपवण्याचं आवाहन केलं.

भगवानगडावरुन भावनिक आवाहन

पंकजा मुंडे म्हणाल्या –
“आपण नवरात्रीत देवीची पूजा केली. त्या देवीने महिषासुर, रक्तबिजासारखे राक्षस संपवले. आजच्या काळात जातीवाद, धर्मवादाचे राक्षस आपल्या बुद्धीत जन्माला येतात. आता हे राक्षस संपविण्याची शक्ती आम्हाला मिळावी हीच माझी प्रार्थना आहे.”

तसेच, वडील दिवंगत गोपीनाथ मुंडेंच्या आठवणी जागवत त्या म्हणाल्या की,
“सावरगाव ओळखीत नव्हतं, पण मी तिथं भगवान बाबांची भव्य मूर्ती उभारली. कुणाचा पैसा घेतला नाही, कार्यकर्त्यांच्या श्रमांतून हे मंदिर उभं राहिलं.”

शेतकऱ्यांसाठी शायरीतून संवेदना

पूरग्रस्त आणि गरीब शेतकऱ्यांना उद्देशून पंकजा मुंडे यांनी भावनिक शायरी म्हटली –

“जब देखती हूँ भुके बच्चे,

फटे हुए कपडों मे माँ,

गरिबी मे तडपता परिवार,

मै खून के आँसू रोती हूँ,

मै गोपीनाथ मुंडे की बेटी हूँ…”

यावेळी उपस्थितांमध्ये टाळ्यांचा कडकडाट झाला.

धनंजय मुंडेंची टोलेबाजी आणि पाठिंबा

यंदाच्या व्यासपीठावर पंकजा मुंडेंचे भाऊ माजी मंत्री धनंजय मुंडेही उपस्थित होते. त्यांनी शायरीतून राजकीय टोलेबाजी केली, पण त्याचवेळी बहिणीने दिलेला आधारही आठवला.
ते म्हणाले –
“माझ्यावर 250 दिवस मीडिया ट्रायल सुरू होती. मी शांत होतो, तेव्हा माझी बहीण पाठीशी उभी होती.”

फडणवीसांची मोठी घोषणा

मेळाव्याच्या पार्श्वभूमीवर मुख्यमंत्री देवेंद्र फडणवीस यांनी मोठी घोषणा केली.
भगवानगड ट्रस्टसाठी वनविभागाची 4 हेक्टर जमीन भक्तगणांच्या सेवासुविधा, रुग्णालय, प्रशिक्षण केंद्र आणि सामाजिक विकासासाठी उपलब्ध करून देण्यात आल्याची अधिसूचना प्रसिद्ध झाली आहे. याबद्दल पंकजा मुंडेंनी मुख्यमंत्र्यांचे आभार मानत ट्विट केले.

मेळाव्यातून संदेश

यंदाच्या दसरा मेळाव्यातून पंकजा मुंडेंनी जातीय राजकारणावर थेट प्रहार केला आणि जातीपातीचे राक्षस संपवण्याचा संदेश दिला. तर धनंजय मुंडेंनी भावनिक अनुभव शेअर करत बहिणीशी असलेले बंध अधोरेखित केले.
भगवानगडावर झालेला हा मेळावा पुन्हा एकदा मराठवाड्यातील राजकारणाचं केंद्रबिंदू ठरला.